वारीदरम्यान शिवसेना शाखाप्रमुख जगन्नाथ सावंत यांचे पंढरपूर येथे हृदयविकाराने दुःखद निधन
राजापूर: तालुक्यातील येरडव गावचे माजी ग्रामपंचायत सदस्य तथा शिवसेना (शिंदे गट) विद्यमान शाखाप्रमुख जगन्नाथ बाळकृष्ण सावंत (वय ७२, रा. येरडव, ता. सावंतवाडी) यांचे मंगळवार, दि. १७ नोव्हेंबर रोजी रात्री ९ वाजण्याच्या सुमारास पंढरपूर येथे वारीदरम्यान हृदयविकाराच्या तीव्र झटक्याने दुःखद निधन झाले. पंढरपूर येथील उपविभागीय रुग्णालय (कॉटेज) येथे उपचार सुरू असताना त्यांची प्राणज्योत मालवली. दरवर्षी पंढरीची वारी न चुकवणारे निष्ठावंत वारकरी म्हणून त्यांची ओळख होती; अखेर पंढरीच्या यात्रेतच विठुरायाच्या चरणी त्यांनी आपला देह ठेवल्याने संपूर्ण येरडव आणि सावंतवाडी परिसरात तीव्र हळहळ व शोककळा पसरली आहे. त्यांच्या पश्चात वडील, दोन मुलगे, सुना आणि नातवंडे असा मोठा परिवार आहे.
हिंदुहृदयसम्राट बाळासाहेब ठाकरे यांचे कट्टर शिवसैनिक म्हणून त्यांनी आयुष्यभर कार्य केले. तळागाळात शिवसेना संघटना वाढविण्यात आणि पक्ष मजबूत करण्यात त्यांचे मोलाचे योगदान राहिले आहे. आमदार भैया सामंत यांचे अत्यंत विश्वासू आणि निष्ठावंत कार्यकर्ते म्हणून ते परिचित होते. एक संवेदनशील सामाजिक कार्यकर्ते आणि माजी ग्रामपंचायत सदस्य या नात्याने त्यांनी येरडव गावाच्या सर्वांगीण विकासकामांमध्ये स्वतःला झोकून देऊन काम केले होते. सर्वसामान्यांच्या अडीअडचणींना धावून जाणारा आणि गावाच्या विकासासाठी सदैव तत्पर असणारा एक मनमिळावू, लढवय्या कार्यकर्ता हरपल्याने राजकीय व सामाजिक क्षेत्रात मोठी पोकळी निर्माण झाली आहे.