न्यू इंग्लिश स्कूल सैतवडेच्या मुला-मुलींची जिल्हास्तरीय सॉफ्टबॉल स्पर्धेत देदीप्यमान कामगिरी

अंडर-१४ व १७ मुलींचे संघ अजिंक्य, मुलांचे संघ उपविजेते!

रत्नागिरी:
क्रीडा व युवक सेवा संचालनालय महाराष्ट्र राज्य, पुणे, जिल्हा क्रीडा परिषद आणि जिल्हा क्रीडाधिकारी कार्यालय, रत्नागिरी यांच्या संयुक्त विद्यमाने स्थानिक छत्रपती शिवाजी महाराज स्टेडियम, मारुती मंदिर, रत्नागिरी येथे आयोजित करण्यात आलेल्या जिल्हास्तरीय शासकीय सॉफ्टबॉल स्पर्धेत शैक्षणिक व सामाजिक संस्था, सैतवडे संचलित न्यू इंग्लिश स्कूल सैतवडेच्या खेळाडूंनी अभूतपूर्व यशाची नोंद केली आहे. १ ऑक्टोबर २०२६ रोजी पार पडलेल्या या अत्यंत चुरशीच्या स्पर्धेत प्रशालेच्या अंडर-१४ आणि अंडर-१७ या दोन्ही वयोगटांतील मुलींच्या संघांनी प्रतिस्पर्ध्यांवर मात करत जिल्हा स्तरावर प्रथम क्रमांक पटकावला असून विभाग स्तरावर दिमाखात धडक मारली आहे.
याच स्पर्धेत प्रशालेच्या मुलांच्या अंडर-१४ व अंडर-१७ वयोगटातील संघांनीदेखील अत्यंत उत्कृष्ट व मैदानी कौशल्याचे प्रदर्शन करत जिल्हा स्तरावर उपविजेतेपद मिळवले. मुला-मुलींच्या या दुहेरी आणि ऐतिहासिक यशाने सैतवडे परिसराच्या क्रीडा क्षेत्रात आनंदाचे वातावरण पसरले आहे.
या यशामागे विद्यार्थ्यांचे अथक परिश्रम, जिद्द आणि शिस्तबद्ध सराव कारणीभूत ठरला आहे. विद्यार्थ्यांच्या या सुप्त क्रीडागुणांना आणि मेहनतीला योग्य ते वळण व आकार देण्याचे महत्त्वपूर्ण कार्य शैक्षणिक व सामाजिक संस्था, सैतवडे तसेच शाळा प्रशासनातील क्रीडा शिक्षक आणि संपूर्ण स्टाफने केले आहे. सर्वच स्तरांतून खेळाडूंच्या या अद्भूत क्रीडा कौशल्याचे कौतुक केले जात आहे.
विद्यार्थ्यांनी जिल्हा स्तरावर मिळवलेल्या या उत्तुंग यशाबद्दल शैक्षणिक व सामाजिक संस्थेचे अध्यक्ष श्री. सज्जाद अ. करीम सय्यद, सचिव श्री. समीर अ. रज्जाक सय्यद, खजिनदार श्री. वहाबभाई खलपे यांच्यासह संस्थेचे सर्व सभासद, प्रशालेच्या मुख्याध्यापिका श्रीम. सिद्धी लांजेकर तसेच माजी विद्यार्थी संघाचे अध्यक्ष श्री. साजिद शेकासन, उपाध्यक्ष श्री. उदय महाकाळ आणि सचिव श्री. दीपक लिंगायत यांनी सर्व विजेत्या व उपविजेत्या खेळाडूंचे विशेष अभिनंदन केले आहे. तसेच विभाग स्तरावर होणाऱ्या पुढील स्पर्धेसाठी सर्व संघांना मनापासून शुभेच्छा दिल्या आहेत.