बंद घर फोडून ६७ हजारांचा ऐवज लंपास

राजापूर खरवते-वाणीवाडी येथील घटना

राजापूर : गौरी-गणपती दर्शनासाठी कुटुंबासह माहेरी गेलेल्या महिलेचे बंद घर फोडून अज्ञात चोरट्याने सोन्या-चांदीचे दागिने आणि रोख रक्कम असा एकूण ६७ हजार ४६८ रुपयांचा ऐवज लंपास केल्याची घटना खरवते-वाणीवाडी येथे घडली. याप्रकरणी राजापूर पोलिस ठाण्यात अज्ञात चोरट्याविरुद्ध गुन्हा दाखल करण्यात आला आहे.

पोलिसांनी दिलेल्या माहितीनुसार, सौ. सानिका संतोष गोरे (वय ४०, रा. खरवते, ता. राजापूर) या १८ सप्टेंबर रोजी सायंकाळी साडेपाच वाजण्याच्या सुमारास आपल्या घराला व गेटला कुलूप लावून पती आणि मुलीसह गौरी-गणपती दर्शनासाठी तळवडे येथे माहेरी गेल्या होत्या. ही संधी साधून अज्ञात चोरट्याने घराच्या मुख्य दरवाज्याचा कडी-कोयंडा हत्याराच्या सहाय्याने तोडून घरात प्रवेश केला.

चोरट्याने घरातील स्टडी रूम आणि बेडरूममधील कपाटे उघडून सोन्याचे कानातील दागिने, सोन्याची कडी, अंगठी, मणी, नाकातील दागिने, सोन्याचे लॉकेट, चांदीचे पैजण, कमरेची साखळी, चांदीचा नाणे तसेच ३० हजार रुपयांची रोख रक्कम असा एकूण ६७ हजार ४६८ रुपयांचा ऐवज चोरून नेला. १९ सप्टेंबर रोजी सकाळी ११.२० वाजता गोरे कुटुंबीय घरी परतल्यानंतर घरफोडी झाल्याचे त्यांच्या निदर्शनास आले.

याप्रकरणी सानिका गोरे यांनी दिलेल्या फिर्यादीवरून राजापूर पोलिस ठाण्यात १९ सप्टेंबर रोजी रात्री ८.५१ वाजता अज्ञात आरोपीविरुद्ध गुन्हा दाखल करण्यात आला आहे. घरफोडीची ही घटना नेमकी कोणत्या पद्धतीने घडली आणि चोरट्याचा माग काढण्यासाठी पोलिसांकडून तपास सुरू आहे.