रत्नागिरी शहरात चोरट्यांचा धुमाकुळ; मारुती मंदिर येथील ‘सुमित्रा ज्वेलर्स’वर डल्ला

शटर उचकटून पावणेदोन लाखांचा मुद्देमाल लंपास
रत्नागिरी:

रत्नागिरी :  शहरात चोरट्यांनी पुन्हा एकदा डोके वर काढले असून, वर्दळीच्या मारुती मंदिर परिसरात घरफोडीची धाडसी घटना घडली आहे. येथील ‘सुमित्रा ज्वेलर्स’ हे दुकान फोडून चोरट्यांनी मोठ्या प्रमाणात चांदीचे दागिने लंपास केले आहेत. सोमवारी पहाटेच्या सुमारास ही घटना घडली असून यामुळे व्यापारी वर्गात भीतीचे वातावरण पसरले आहे.
मिळालेल्या माहितीनुसार, मारुती मंदिर येथील सुमित्रा ज्वेलर्स हे दुकान रविवारी रात्री नेहमीप्रमाणे बंद करण्यात आले होते. मध्यरात्रीच्या सुमारास अज्ञात चोरट्यांनी दुकानाच्या शटरचे कुलूप तोडून किंवा शटर उचकटून आत प्रवेश केला. चोरट्यांनी दुकानातील शोकेस आणि कपाटांची उचकापाचक केली. यामध्ये त्यांच्या हाती चांदीचे दागिने आणि वस्तू लागल्या. चांदीच्या साहित्यावर चोरट्यांनी डल्ला मारला आहे. शटर उचकटून पावणेदोन लाखांचा मुद्देमाल लंपास केला आहे.

नेहमीप्रमाणे सोमवारी सकाळी जेव्हा दुकानदार दुकान उघडण्यासाठी आले, तेव्हा त्यांना शटर उचकटलेले दिसले. दुकानाच्या आत गेल्यानंतर सर्व सामान अस्ताव्यस्त पडलेले पाहून चोरी झाल्याचे स्पष्ट झाले. या घटनेची माहिती मिळताच परिसरात बघ्यांची मोठी गर्दी जमली होती.
या घटनेची माहिती तातडीने रत्नागिरी शहर पोलीस स्थानकाला देण्यात आली. पोलिसांनी घटनास्थळी धाव घेऊन पंचनामा केला आहे. परिसरातील सीसीटीव्ही फुटेजची तपासणी पोलिसांकडून केली जात असून, चोरट्यांचा माग काढण्यासाठी श्वानपथक आणि ठसेतज्ज्ञांची मदत घेतली जाण्याची शक्यता आहे. शहर पोलीस या प्रकरणाचा अधिक तपास करत आहेत.
शहराच्या मुख्य बाजारपेठेत आणि वर्दळीच्या ठिकाणी झालेल्या या चोरीमुळे पोलिसांच्या गस्तीवर प्रश्नचिन्ह उपस्थित केले जात असून, चोरट्यांचा बंदोबस्त करण्याची मागणी नागरिकांकडून होत आहे.