राजिवडा खाडीतील गाळ उपशाला गती द्या

कोअर कमिटीचे जिल्हाधिकाऱ्यांना निवेदन

रत्नागिरी : राजिवडा खाडी व मांडवी खाडीमुखातील गाळ उपशाचे काम तातडीने सुरू करून सुरू असलेल्या ब्रेकवॉटरच्या कामास गती देण्याबाबत जमातुल मुस्लिमीन राजिवडा कोअर कमिटी व मच्छीमार संयुक्त संघर्ष समितीने जिल्हाधिकारी यांना निवेदन दिले आहे.

निवेदनात म्हटले आहे की, राजिवडा खाडी व मांडवी खाडीमुखाशी दरवर्षी मोठ्या प्रमाणात गाळ, वाळू व सॅण्ड बार साचत असल्यामुळे मच्छीमारांच्या होड्यांच्या सुरक्षित ये-जा करण्याचा प्रश्न गेल्या अनेक वर्षांपासून गंभीर आहे. विशेषतः छोट्या मच्छीमारांना कमी पाण्याची खोली व गाळामुळे मोठ्या अडचणींचा सामना करावा लागतो. नौका अडकणे, नुकसान होणे तसेच जिविताला धोका निर्माण होण्याच्या घटना घडल्या आहेत.

या प्रश्नाची दखल घेत जमातुल मुस्लिमीन राजिवडा कोअर कमिटी तथा राजिवडा-फणसोप, भाट्ये, सोमेश्वर व करला परिसरातील मच्छीमार संयुक्त संघर्ष समितीने गेल्या चार-पाच वर्षांपासून सातत्याने शासनाकडे पाठपुरावा केला आहे. यासाठी आंदोलनाचा इशाराही देण्यात आला होता.

या पाठपुराव्यादरम्यान जनता दरबारामध्ये पालकमंत्री डॉ. उदय सामंत यांची अनेकदा यांच्यासमोर गाळाचा बंधाऱ्याचा प्रश्न अनेकदा मांडण्यात आला होता. त्यांच्यामुळेच हा प्रश्न मार्गी लागला. तसेच खासदार नारायण राणे यांची भेट घेऊन प्रश्न मांडण्यात आला. संबंधित लोकप्रतिनिधी व अधिकाऱ्यांनी सहकार्य केल्याबद्दल समितीने आभार मानले आहेत.

दरम्यान, भाट्ये येथे ब्रेकवॉटर / ग्रोयन्सचे काम सुरू झाले आहे. त्यामुळे राजिवडा खाडीतील गाळ उपशाचे कामही लवकरात लवकर सुरू होणे आवश्यक आहे. ब्रेकवॉटर आणि गाळ उपसा ही दोन्ही कामे परस्परपूरक असून मच्छीमारांच्या सुरक्षिततेच्या दृष्टीने अनावश्यक विलंब होऊ नये, अशी ठाम मागणी निवेदनात करण्यात आली आहे. काही नागरिकांनी तांत्रिक व पर्यावरणीय शंका उपस्थित केल्या असल्या तरी त्या शंकांची कागदपत्रे व तांत्रिक अहवालाच्या आधारे तपासणी करावी, मात्र या कारणामुळे मच्छीमारांच्या वर्षानुवर्षांच्या मागणीला विलंब होऊ नये, असे समितीने स्पष्ट केले आहे.

यावेळी राजिवडा कोअर कमिटीचे अध्यक्ष नजीर वाडकर, कार्याध्यक्ष इम्रान सोलकर, सल्लागार शकील दावत, रहीम दलाल, लुकमान कोतवडेकर आदि उपस्थित होते.