नाझीमा गोलंदाज ‘अरुणा पुरस्कारा’ने सन्मानित; सामाजिक, शैक्षणिक क्षेत्रातील कार्याची दखल

रत्नागिरी : समाजातील वंचित, गरजू व सर्वसामान्य घटकांच्या सर्वांगीण उन्नतीसाठी सामाजिक आणि शैक्षणिक क्षेत्रात सातत्याने उल्लेखनीय योगदान देणाऱ्या सामाजिक कार्यकर्त्या नाझीमा रमजान गोलंदाज यांना भारतीय कष्टकरी रयत सेवा संस्था (भाकर) यांच्या वतीने सन २०२६–२७ चा मानाचा ‘अरुणा पुरस्कार’ प्रदान करण्यात आला. या प्रतिष्ठेच्या पुरस्काराने त्यांच्या निःस्वार्थ कार्याचा यथोचित गौरव झाल्याने विविध क्षेत्रांतील मान्यवरांकडून त्यांच्यावर अभिनंदनाचा व शुभेच्छांचा मोठा वर्षाव होत आहे.

समाजासाठी समर्पित भावनेने कार्य करणाऱ्या व्यक्तींच्या योगदानाची दखल घेऊन दिला गेलेला हा सन्मान म्हणजे नाझीमा गोलंदाज यांच्या दीर्घकालीन सामाजिक व शैक्षणिक बांधिलकीला मिळालेली खरीखुरी पोचपावती ठरली आहे. ग्रामीण भागातील सर्वसामान्य नागरिकांची प्रगती, महिलांचे सक्षमीकरण, ज्येष्ठ नागरिकांचे प्रश्न आणि विद्यार्थ्यांना शिक्षणासाठी प्रोत्साहन अशा विविध आघाड्यांवर त्यांनी सातत्याने महत्त्वपूर्ण भूमिका बजावली आहे. सामाजिक विकास हा केवळ शासकीय योजनांवर अवलंबून न राहता समाजातील संस्था व व्यक्तींच्या पुढाकारातून साकारला पाहिजे, या विचारातून त्या सातत्याने सक्रिय आहेत.

विशेषतः ग्रामीण भागातील विद्यार्थ्यांना दर्जेदार आणि आधुनिक शिक्षण मिळावे, आर्थिक अडचणींमुळे कोणत्याही विद्यार्थ्याचे नुकसान होऊ नये आणि त्यांच्यात आत्मविश्वास निर्माण व्हावा, यासाठी त्यांनी विशेष प्रयत्न केले आहेत. नवनिर्मिती फाउंडेशनच्या माध्यमातून सुरू असलेल्या सामाजिक, शैक्षणिक उपक्रमांमध्ये त्यांचा सक्रिय सहभाग राहिला असून, संगमेश्वर तालुक्यातील आंबेड बुद्रुक येथील न्यू व्हिजन इंग्लिश मीडियम स्कूलच्या माध्यमातून ग्रामीण विद्यार्थ्यांना इंग्रजी शिक्षणाची संधी उपलब्ध करून देण्यात त्यांनी मोलाचा वाटा उचलला आहे. नवीन पिढीच्या उज्ज्वल भविष्यासाठी पोषक वातावरण निर्माण करण्याच्या त्यांच्या या प्रयत्नांचे सर्वत्र कौतुक होत आहे.

या पुरस्कार वितरण सोहळ्यास शासनाचा समाजभूषण पुरस्कार प्राप्त दिलीप रेडकर, ॲड. समीर जाधव, संस्थेचे संस्थापक देवेंद्र पाटील, सचिव अश्विनी मोरे, उद्योजक संजय सूर्यवंशी, निलेश जाधव, रोशन कांबळे, अभिजित किंजले यांच्यासह सामाजिक, शैक्षणिक क्षेत्रातील अनेक मान्यवर मोठ्या संख्येने उपस्थित होते. मिळालेल्या या मानाच्या पुरस्कारामुळे नाझीमा गोलंदाज यांच्या कार्याला नवी ऊर्जा आणि व्यापक ओळख लाभली असून, भविष्यातील वाटचालीसाठी सामाजिक कार्यकर्ते, मित्रपरिवार व सर्व स्तरांतील नागरिकांमधून त्यांच्यावर शुभेच्छांचा वर्षाव केला जात आहे.