अरबी समुद्रात ‘सागर कवच-०२/२६’चा कडक पहारा

महाराष्ट्राच्या मुख्य सचिवांकडून सुरक्षेचा आढावा!
४,८०० हून अधिक जवान अन् अधिकाऱ्यांचा सहभाग

गिरगाव चौपाटीवर एनएसजी आणि तटरक्षक दलाचे प्रात्यक्षिक | बहुस्तरीय यंत्रणांचे अभेद्य जाळे

रत्नागीिरी

महाराष्ट्राच्या विस्तीर्ण किनारपट्टीला लागून असणाऱ्या संभाव्य सागरी धोक्यांना चाप लावण्यासाठी आणि किनारपट्टीच्या रक्षणासाठी भारतीय तटरक्षक दलातर्फे आयोजित करण्यात आलेला ‘सागर कवच-०२/२६’ हा संयुक्त सुरक्षा सराव गुरुवारी (१ ऑक्टोबर) यशस्वीरीत्या पार पडला. ३० सप्टेंबर आणि १ ऑक्टोबर असे दोन दिवस महाराष्ट्र आणि गोव्याच्या किनारपट्टीवर रंगलेल्या या सरावात सुमारे ४,८०० हून अधिक जवान आणि अधिकाऱ्यांनी सक्रिय सहभाग नोंदवत सागरी सुरक्षेचे अभेद्य जाळे विणले. या सरावाच्या अंतिम दिवशी महाराष्ट्राचे मुख्य सचिव राजेश अग्रवाल यांनी स्वतः मुंबईतील गिरगाव चौपाटी येथे उपस्थित राहून किनारी सुरक्षेच्या सज्जतेचा सविस्तर आढावा घेतला.

गिरगाव चौपाटीवर थरारक प्रात्यक्षिक अन् हवाई पाहणी

महाराष्ट्राचे मुख्य सचिव राजेश अग्रवाल (भा.प्र.से.) यांनी राज्य सरकारच्या वरिष्ठ अधिकाऱ्यांसह गिरगाव चौपाटीवरून सागरी सुरक्षेच्या प्रगतीची प्रत्यक्ष पाहणी केली. या उच्चस्तरीय आढाव्यादरम्यान राष्ट्रीय सुरक्षा रक्षक (NSG) आणि तटरक्षक दलाच्या जलद कृती दलाने (RRT) सागरी संकट काळात केली जाणारी संयुक्त रणनीतिक मोहीम आणि थरारक प्रात्यक्षिके सादर केली. यानंतर महत्त्वाच्या किनारी आस्थापनांच्या सुरक्षेची आणि आपत्कालीन प्रतिसादाची क्षमता तपासण्यासाठी विशेष हवाई पाहणीही करण्यात आली.

माझगाव डॉकमध्ये शत्रूचा हल्ला निष्प्रभ करण्याचे बनावट प्रात्यक्षिक

या दोन दिवसीय सरावात रेवदंडा, पालघर, अलिबाग, गोवा आणि सागरी लँडिंग पॉईंट्स यांसारख्या अत्यंत संवेदनशील ठिकाणांवरून समुद्रातून होणाऱ्या संभाव्य घुसखोरीचे बनावट प्रसंग (Mock Drills) निर्माण करण्यात आले होते. माझगाव डॉकयार्ड लिमिटेड येथे एनएसजी आणि तटरक्षक दलाच्या तुकड्यांनी चालवलेली विशेष संयुक्त मोहीम या सरावाचे मुख्य आकर्षण ठरली. सागरी पायाभूत सुविधांवर होणारे संभाव्य शत्रूचे हल्ले कसे उधळून लावायचे, याचे थेट प्रात्यक्षिक या मोहिमेत दाखवण्यात आले.

अनेक यंत्रणांच्या एकत्रीकरणातून ‘अभेद्य’ सुरक्षा कवच

या बहुस्तरीय सरावामध्ये तटरक्षक दल आणि भारतीय नौदलाची युद्धनौका, डॉर्नियर विमाने, हेलिकॉप्टर्स आणि होव्हरक्राफ्ट्सचा मोठ्या प्रमाणावर वापर करण्यात आला. या मोहिमेत भारतीय नौदल, राज्य पोलीस, एनएसजी, गुप्तचर यंत्रणा, कस्टम्स, सीआयएसएफ, एनसीसी, महाराष्ट्र मेरीटाईम बोर्ड, एटीएस, एनसीबी आणि मत्स्यव्यवसाय विभागासह अनेक केंद्रीय व राज्य यंत्रणांनी एकत्र येत आपल्या आंतर-यंत्रणा समन्वयाची कसून परीक्षा घेतली. ‘सागर कवच-०२/२६’ च्या या यशस्वी आयोजनामुळे पश्चिम किनारपट्टीवर कोणतीही घुसखोरी रोखण्यासाठी सुरक्षा दल पूर्णपणे सज्ज असल्याचे स्पष्ट झाले आहे.