जिल्ह्यात ५५ हजार ४०० हेक्टरवर खरिपाचे उद्दिष्ट

कृषी विभागाकडून नियोजनाला वेग

रत्नागिरी:

मे महिना सुरू होताच कोकणात मान्सूनपूर्व कामांची लगबग वाढली आहे. रत्नागिरी जिल्ह्यातील शेतकरी आगामी खरीप हंगामाच्या तयारीला लागले असून कृषी विभागानेही कंबर कसली आहे. यंदाच्या हंगामासाठी जिल्ह्यात ५५ हजार ४०० हेक्टर क्षेत्रावर पेरणीचे उद्दिष्ट निश्चित करण्यात आले असून, खते आणि बियाणांचा पुरवठा सुरळीत ठेवण्यावर भर दिला जात आहे.

खरिपाच्या नियोजनाला अंतिम रूप देण्यासाठी येत्या १५ मे पर्यंत पालकमंत्री डॉ. उदय सामंत यांच्या उपस्थितीत जिल्हास्तरीय आढावा बैठक पार पडणार आहे. विशेष म्हणजे, गतवर्षाच्या तुलनेत यंदा पेरणी क्षेत्रात सुमारे २०० हेक्टरची वाढ अपेक्षित धरण्यात आली आहे.

कोकणात खरीप हंगामात प्रामुख्याने भात आणि नाचणीची लागवड केली जाते. साधारणपणे मे महिन्याच्या अखेरीस ‘रोहिणी’ नक्षत्रावर धूळवाफेवर पेरणी करण्यासाठी शेतकरी सध्या शेतीची मशागत आणि बियाणांची जुळवाजुळव करण्यात व्यस्त आहेत.

कृषी विभागाने यंदा १९ हजार ७० मेट्रिक टन खतांची मागणी केली होती, त्यापैकी शासनाने १२ हजार ५५० मेट्रिक टन खतांचे आवंटन मंजूर केले आहे. यामध्ये युरिया: ६,६०० मेट्रिक टन, संयुक्त खते ४,६०० मेट्रिक टन, एसएसपी १,००० मेट्रिक टन, एमओपी २०० मेट्रिक टन, डीएपी १५० मेट्रिक टन खताची मागणी करण्यात आली आहे.

बियाणे बदल धोरणानुसार, जिल्ह्यासाठी महाबीज आणि खाजगी कंपन्यांमार्फत सुमारे २ हजार क्विंटल बियाणांची मागणी नोंदवण्यात आली आहे. शेतकऱ्यांना दर्जेदार बियाणे वेळेत उपलब्ध करून देण्यासाठी कृषी विद्यापीठे आणि महाबीज सज्ज आहेत.

कोकणातील रत्नागिरी जिल्ह्यात खरीप हंगामात प्रामुख्याने भात (तांदूळ) आणि नाचणी या पिकांची मोठ्या प्रमाणावर लागवड केली जाते. साधारणपणे रोहिणी नक्षत्राच्या सुमारास, म्हणजेच मे महिन्याच्या अखेरीस किंवा जूनच्या पहिल्या आठवड्यात पावसाची चाहूल लागताच पेरणीला सुरुवात होते. सध्या जिल्ह्यातील शेतकरी शेताची मशागत, बियाणांची उपलब्धता आणि खतांची जुळवाजुळव करण्यात व्यस्त असल्याचे चित्र पाहायला मिळत आहे.