निवडणूक शाखेचे महसूल सहायक अजित पिलणकर विशेष सन्मानित

रत्नागिरीत ‘महसूल दिन’ उत्साहात साजरा

रत्नागिरी:
जिल्हाधिकारी कार्यालय, रत्नागिरीच्या वतीने ०१ ऑगस्ट रोजी ‘महसूल दिन’ अत्यंत उत्साहात साजरा करण्यात आला. या, विशेष प्रसंगी महसूल प्रशासन अधिक लोकाभिमुख व गतिमान करण्यासाठी उल्लेखनीय कामगिरी बजावणाऱ्या अधिकारी व कर्मचाऱ्यांचा गौरव करण्यात आला.

​जिल्हाधिकारी कार्यालयाच्या निवडणूक शाखेत कार्यरत असलेले महसूल सहायक श्री. अजित सदानंद पिलणकर यांना त्यांच्या उत्कृष्ट कामगिरीबद्दल गौरविण्यात आले. सन २०२५-२६ या महसुली वर्षामध्ये महसुली कामकाज अधिक गतिमान करणे, शासकीय योजनांची प्रभावी अंमलबजावणी करणे आणि उत्कृष्ट सेवा देऊन शासनाची प्रतिमा उंचावण्यात त्यांचे मोलाचे योगदान राहिले आहे.
​
​श्री. पिलणकर यांच्या या उत्कृष्ट कार्याची दखल घेऊन ‘महसूल दिनाचे’ औचित्य साधून त्यांना विशेष सन्मानपत्राने सन्मानित करण्यात आले. “हा सन्मान आपला व आपल्या कार्यकर्तृत्वाचा…” अशा शब्दांत रत्नागिरीचे जिल्हाधिकारी मनुज जिंदल (भा.प्र.से.) यांनी त्यांचे अभिनंदन केले व उज्ज्वल भविष्यासाठी शुभेच्छा दिल्या. तसेच निवासी उपजिल्हाधिकारी चंद्रकांत सूर्यवंशी, उपजिल्हा निवडणूक अधिकारी राहुल गायकवाड, नायब तहसीलदार दीपक चव्हाण व कार्यालयातील सहकारी कर्मचारी यांनीही अजित पिलणकर यांचे अभिनंदन केले.​ या गौरव सोहळ्यामुळे महसूल विभागातील इतर अधिकारी व कर्मचाऱ्यांमध्येही उत्साहाचे वातावरण असून, त्यांच्या या यशाबद्दल सर्व स्तरातून त्यांचे अभिनंदन होत आहे.