राजापुरात भरधाव ट्रॅक्टर चालकावर गुन्हा दाखल

राजापूर: रस्त्याच्या विशिष्ट परिस्थितीकडे दुर्लक्ष करून भरधाव वेगाने ट्रॅक्टर चालवणाऱ्या चालकाविरुद्ध राजापूर तालुक्यातील सागरी पोलीस ठाणे नाटे येथे गुन्हा दाखल करण्यात आला आहे.

​सागरी पोलीस ठाणे नाटे येथील पोलीस कॉन्स्टेबल सचिन देवीदास आडबे (वय ३०) हे २९ जुलै रोजी सायंकाळी ६:३० वाजेच्या सुमारास नाटे ते धारतळे जाणाऱ्या रस्त्यावर गस्त (पेट्रोलिंग) घालत होते. त्यावेळी वाघेडी बस स्टॉपसमोर आल्यावर, नाटेकडून धारतळेकडे जाणारा सॉलिस ट्रॅक्टर (क्र. केओ २८ टीओ ७३९०) ट्रॉलीसह जात होता.
​या ट्रॅक्टरचा चालक हरी लक्ष्मण हाके (वय २८, रा. मु.पो. नाटे गणेशनगर, ता. राजापूर, जि. रत्नागिरी) हा रस्त्याची विशिष्ट परिस्थिती लक्षात न घेता, आपले वाहन भरधाव वेगाने आणि निष्काळजीपणे चालवताना दिसून आला. याप्रकरणी पोलीस नाईक फिर्यादी यांनी दिलेल्या तक्रारीवरून ट्रॅक्टर चालकाविरुद्ध पोलिसांत कायदेशीर कारवाई करण्यात आली आहे.