जयगड खाडीत मध्यरात्री ५,५०० लीटर बेकायदेशीर डिझेलसह नौका जप्त

रत्नागिरीत कस्टम विभागाची मोठी कारवाई

रत्नागिरी:- रत्नागिरीतील जयगड खाडीत कस्टम विभागाने मध्यरात्रीच्या सुमारास एक मोठी कारवाई करत एका मासेमारी नौकेतून मोठ्या प्रमाणावर होणारी डिझेलची बेकायदेशीर वाहतूक उघडकीस आणली आहे. पुणे कस्टम्स आयुक्तालयाच्या अंतर्गत येणाऱ्या रत्नागिरी कस्टम्स विभागाने ही धडक कारवाई केली असून, प्राथमिक अंदाजानुसार सुमारे ५,५०० लीटर संशयास्पद डिझेल जप्त करण्यात आले आहे.

कस्टम्स विभागाला मिळालेल्या गोपनीय माहितीनुसार, काही इसम एका मासेमारी नौकेचा वापर करून कस्टम कायद्याचे उल्लंघन करत बेकायदेशीररीत्या डिझेलची तस्करी करणार होते. या माहितीच्या आधारे कस्टम अधिकाऱ्यांच्या वेगवेगळ्या पथकांनी जयगड खाडीच्या उत्तर आणि दक्षिण अशा दोन्ही बाजूंच्या परिसरात कडक पाळत ठेवली होती, तर एक पथक खाडीत स्वतः नौकेने गस्त घालत होते.

२६ मे रोजी मध्यरात्री अडीच वाजण्याच्या सुमारास, खाडीत गस्त घालणाऱ्या पथकाला पडवे जेट्टीच्या समोर एक संशयास्पद मासेमारी नौका आढळून आली. अधिकाऱ्यांनी ही नौका अडवून तिची तपासणी केली असता, त्यात ड्रममध्ये भरलेले अंदाजे ५,५०० लीटर डिझेल सापडले. या नौकेवर केवळ ५ कर्मचाऱ्यांचा ताफा होता. नौकेची सखोल तपासणी केली असता, ती मासेमारीच्या उद्देशाने वापरली जात नसल्याचे स्पष्ट झाले. प्राथमिक चौकशीतून समोर आलेल्या माहितीनुसार, हे डिझेल खोल समुद्रात एखाद्या मोठ्या बार्ज किंवा टगबोटवरून बेकायदेशीरपणे खरेदी करण्यात आले होते.

कस्टम कायद्यांतर्गत जप्त करण्यायोग्य असल्याच्या संशयावरून अधिकाऱ्यांनी हे डिझेल, वाहतुकीसाठी वापरलेली नौका आणि इतर आक्षेपार्ह साहित्य जप्त केले आहे. जप्त केलेल्या डिझेलचे अचूक मोजमाप, त्याचे मूल्य आणि नौकेची किंमत निश्चित करण्याचे काम सध्या सुरू आहे. या बेकायदेशीर रॅकेटच्या मागे आणखी कोणकोणत्या व्यक्तींचा हात आहे, हे डिझेल नेमके कुठून आणले जात होते आणि त्यांच्या तस्करीतल्या इतर पद्धती काय आहेत, याचा सखोल तपास कस्टम विभागाकडून केला जात आहे.