शिरगाव येथे घरफोडीत १ लाखाचा मुद्देमाल लंपास

रत्नागिरी:
शहरातील शिरगाव परिसरातील शिवसृष्टी अपार्टमेंटमध्ये भरदिवसा घरफोडीची घटना घडली आहे. अज्ञात चोरट्याने बंद फ्लॅटचे कुलूप तोडून घरातील सोन्याचे दागिने आणि रोख रक्कम असा एकूण १ लाख ५ हजार ४५० रुपयांचा मुद्देमाल चोरून नेला आहे.

​शिरगाव येथील बाणखिंड परिसरातील वसुंधरा बिल्डिंगमधील ‘शिवसृष्टी अपार्टमेंट’मध्ये राहणाऱ्या सौ. स्मिता संतोष सुर्वे (वय ५३) या १६ फेब्रुवारी २०२६ रोजी सकाळी ७:०० वाजता घराला कुलूप लावून परकार हॉस्पिटल येथे नोकरीसाठी गेल्या होत्या. दुपारी ३:३० वाजण्याच्या सुमारास त्या घरी परतल्या असता, त्यांना घराच्या दरवाजाचे कुलूप तुटलेले दिसले. घरात प्रवेश केला असता, बेडरूममधील लोखंडी कपाटाच्या लॉकरमधील दागिने आणि रोख रक्कम चोरीला गेल्याचे त्यांच्या निदर्शनास आले.

​चोरट्याने ​सोन्याची ठुशी: ५ ग्रॅम, ​सोन्याची अंगठी: ६ ग्रॅम, ​सोन्याचे कानातले जोड: ५ ग्रॅम, ​सोन्याचे छोटे कानातले: ३ ग्रॅम, ​रोख रक्कम या वस्तू लंपास केल्या आहेत.

​या प्रकरणी स्मिता सुर्वे यांनी रत्नागिरी शहर पोलीस ठाण्यात फिर्याद दिली आहे. पोलिसांनी अज्ञात चोरट्याविरुद्ध भारतीय न्याय संहिता २०२३ चे कलम ३०५ (अ) आणि ३३१ (३) नुसार गुन्हा रजिस्टर नंबर ४१/२०२६ दाखल केला आहे. दिवसाढवळ्या झालेल्या या घरफोडीमुळे परिसरात भीतीचे वातावरण असून, पोलीस चोरट्याचा शोध घेत आहेत.