चिपळूणमध्ये २३ जानेवारीला ‘रत्नागिरी श्री’ जिल्हास्तरीय शरीरसौष्ठव स्पर्धेचा थरार; ५२ हजारांची रोख पारितोषिके

चिपळूण:

रत्नागिरी जिल्हा हौशी शरीर सौष्ठव संघटनेच्या मान्यतेने आणि आदर्श क्रीडा सामाजिक प्रबोधिनी, चिपळूण यांच्या वतीने आगामी शुक्रवार, दि. २३ जानेवारी २०२६ रोजी चिपळूणमध्ये जिल्हास्तरीय अजिंक्यपद शरीरसौष्ठव स्पर्धेचे आयोजन करण्यात आले आहे. वाशिष्ठी सोसायटी, काविळतळी येथील बांदल हायस्कूलच्या प्रांगणात सायंकाळी ५.०० वाजल्यापासून हा देदीप्यमान सोहळा रंगणार आहे.

​कै. गिरीधर मांजरेकर यांच्या स्मृतीप्रत्यर्थ विशेष पारितोषिके
​या स्पर्धेतील मुख्य आकर्षण असलेल्या ‘रत्नागिरी श्री’ गटासाठी, जैतापूरचे सुपुत्र आणि माजी शरीरसौष्ठवपटू कै. गिरीधर सिताराम मांजरेकर (निवृत्त विभागीय उपायुक्त, नाशिक) यांच्या स्मरणार्थ त्यांची पत्नी श्रीमती शुभदा मांजरेकर व मुले रणजित आणि प्रताप मांजरेकर यांच्याकडून एकूण ५२,००० रुपयांची रोख पारितोषिके देण्यात येणार आहेत. यात ‘रत्नागिरी श्री’ विजेत्यास ३१,००० रुपये आणि उपविजेत्यास २१,००० रुपये व भव्य फिरता चषक देऊन गौरविण्यात येईल.

​स्पर्धेचे विविध गट आणि स्वरूप
​ही स्पर्धा केवळ रत्नागिरी जिल्ह्यातील स्थानिक खेळाडूंसाठी असून यामध्ये खालील गटांचा समावेश असेल:

​रत्नागिरी श्री: ३० ते ४० वयोगट
​रत्नागिरी उदय: नवोदित खेळाडू (२० वर्षांपर्यंत)
​रत्नागिरी किशोर: २५ वर्षांपर्यंत
​रत्नागिरी कुमार: ३० वर्षांपर्यंत
​रत्नागिरी श्रीमान: ४० वर्षांवरील आणि ५० वर्षांवरील गट
​मेन्स् फिजीक व फिटनेस: उंचीनुसार विविध गट
​राज्यस्तरीय स्पर्धेसाठी निवड चाचणी
​ही स्पर्धा राज्यस्तरीय स्पर्धेसाठीची अधिकृत निवड चाचणी आहे. प्रत्येक गटातील प्रथम ५ क्रमांकांच्या खेळाडूंची निवड राज्य स्पर्धेसाठी केली जाईल. विशेष म्हणजे, जे खेळाडू मुंबई किंवा इतरत्र नोकरी निमित्त राहतात आणि तिथे स्पर्धा खेळतात, त्यांना या स्पर्धेत सहभाग घेता येणार नाही.

​नोंदणी आणि नियम
​वेळ: उंची मोजणे व कागदपत्र छाननी दुपारी ३.०० वाजता सुरू होईल.
​आवश्यक कागदपत्रे: जन्मतारखेचा मूळ दाखला (ग्रामपंचायत/नगरपालिका), आधार कार्ड, पॅनकार्ड किंवा पासपोर्ट. वास्तव्याच्या पुराव्यासाठी मूळ रेशनकार्ड आणि २ फोटो अनिवार्य आहेत.
​आयोजक आणि संपर्क
​आदर्श क्रीडा सामाजिक प्रबोधिनीचे अध्यक्ष श्री. सचिन उर्फ भैया कदम यांच्या मार्गदर्शनाखाली या स्पर्धेचे नियोजन करण्यात आले आहे. अधिक माहितीसाठी खेळाडूंनी श्री. सदानंद जोशी (९४२२३७२२९६), श्री. जितेंद्र नाचणकर (८६६८३७५१७५) किंवा श्री. भैया कदम (९३२२९३१७५५) यांच्याशी संपर्क साधावा, असे आवाहन जिल्हा संघटनेतर्फे करण्यात आले आहे.