रत्नागिरी एमआयडीसीमध्ये भीषण आग

रत्नागिरी: (प्रतिनिधी) १३ डिसेंबर
रत्नागिरी औद्योगिक विकास महामंडळ परिसरामध्ये पहाटे कॉलिटी प्रिंटर्सन या पुठ्ठा आणि पॅकेजिंग साहित्य उत्पादन करणाऱ्या कंपनीला भीषण आग लागल्याची घटना घडली आहे. ही आग इतकी मोठी होती की अल्पावधीतच संपूर्ण कंपनी आगीच्या भक्ष्यस्थानी पडली आणि पूर्णपणे भस्मसात झाली. या दुर्घटनेमध्ये कंपनीचे कोट्यवधी रुपयांचे मोठे नुकसान झाले असून, अग्निशमन दलाच्या अथक प्रयत्नानंतर आगीवर नियंत्रण मिळवण्यात यश आले आहे.
आज पहाटे ५:०० वा अंदाजे च्या दरम्यान, कॉलिटी प्रिंटर्सन या कंपनीतून अचानक धुराचे आणि आगीचे लोळ दिसू लागले. कंपनीमध्ये पुठ्ठा, कागद, आणि इतर ज्वलनशील पॅकेजिंग साहित्य मोठ्या प्रमाणात असल्याने आग अतिशय वेगाने पसरली. कर्मचाऱ्यांनी तातडीने आग विझवण्याचा प्रयत्न केला, परंतु आगीने अवघ्या काही मिनिटांतच रौद्ररूप धारण केले.
आगीचे स्वरूप लक्षात येताच तातडीने एमआयडीसी आणि रत्नागिरी नगरपरिषदेच्या अग्निशमन दलाला पाचारण करण्यात आले. आकाशात दूरवर आगीचे मोठे लोळ दिसत असल्याने एमआयडीसी परिसरातील उद्योजकांमध्ये आणि नागरिकांमध्ये भीतीचे वातावरण पसरले होते.
आगीवर नियंत्रण मिळवण्यासाठी शर्थीचे प्रयत्न
आगीची भीषणता पाहता एमआयडीसीतील इतर कंपन्या आणि नजीकच्या ठिकाणाहून अग्निशमन दलाच्या गाड्या घटनास्थळी दाखल झाल्या. अग्निशमन दलाच्या जवानांनी पाण्याच्या जोरदार फवाऱ्यांनी आग विझवण्याचे शर्थीचे प्रयत्न केले.
पुठ्ठा आणि कागदाच्या गठ्ठ्यांमध्ये आग आतपर्यंत पसरल्यामुळे ती पूर्णपणे विझवण्यासाठी जवानांना खूप संघर्ष करावा लागला. पहाटेच्या सुमारास अथक परिश्रमानंतर ही आग पूर्णपणे नियंत्रणात आणण्यात अग्निशमन दलाला यश आले. आगीवर वेळीच नियंत्रण मिळाल्याने ही आग शेजारील अन्य कंपन्यांपर्यंत पोहोचू शकली नाही, त्यामुळे मोठे संभाव्य नुकसान टळले.
कोट्यवधी रुपयांचे नुकसान
या भीषण आगीत कंपनीमधील तयार माल, कच्चा माल (पुठ्ठा रोल, कागद) आणि आधुनिक उत्पादन यंत्रसामग्रीचे मोठे नुकसान झाले आहे. कंपनीतील सर्व साहित्य जळून खाक झाले असून, प्राथमिक अंदाजानुसार हे नुकसान कोट्यवधी रुपयांच्या घरात असण्याची शक्यता आहे. सुदैवाने, ही घटना पहाटे घडल्याने कोणतीही जीवितहानी झाली नाही.
आग नेमकी कशामुळे लागली, याचे नेमके कारण अद्याप स्पष्ट झालेले नाही. शॉर्ट सर्किटमुळे आग लागल्याचा प्राथमिक अंदाज व्यक्त होत आहे. पोलीस आणि एमआयडीसीचे अधिकारी या घटनेची सखोल चौकशी करत असून, पंचनामा झाल्यानंतर नुकसानीचा नेमका आकडा स्पष्ट होईल