माझ्या निष्ठेचे प्रमाणपत्र कोणाकडूनही घेण्याची गरज नाही

उदय सामंत यांचा रोखठोक पवित्रा

रत्नागिरी: राज्याचे उद्योगमंत्री आणि रत्नागिरी जिल्ह्याचे पालकमंत्री उदय सामंत यांनी आज पत्रकार परिषदेत विविध राजकीय मुद्द्यांवर ‘रोखठोक’ मते मांडली. विशेषतः शिवसेना (उद्धव बाळासाहेब ठाकरे) नेत्या सुषमा अंधारे यांच्यावरील टीकेला पूर्णविराम देत, त्यांनी आता अन्य विषयांवर लक्ष केंद्रित केले आहे.

​सुषमा अंधारे यांनी नरेश म्हस्के यांची भेट का घेतली, याबद्दल सामंत यांनी उपस्थित केलेल्या प्रश्नावर अंधारे यांनी खुलासा केल्यानंतर सामंत यांनी आता या वादावर पडदा टाकला आहे.

​सामंत म्हणाले, “सुषमा अंधारे यांनी माझ्याबद्दल केलेल्या वक्तव्यानंतर मी त्यांना नरेश म्हस्के यांना भेटण्याबाबत विचारले होते. त्यांनी आता खुलासा केला आहे, त्यामुळे माझ्यासाठी अंधारे ताईंचा विषय संपलेला आहे.”

​ते पुढे म्हणाले, “माझ्या निष्ठेचे प्रमाणपत्र कोणाकडूनही घेण्याची मला आवश्यकता नाही. त्यांनी कितीही पोस्ट टाकल्या तरी मला फरक पडत नाही, उलट माझ्या मनात त्यांच्याबद्दल आदर आहे. यापुढे त्यांच्या टीकेवर किंवा ट्विटवर मी बोलणार नाही. मी त्यांना उलटा प्रश्न विचारला तर त्यांची अडचण होईल.”​

शिवसेना (उबाठा) पक्षाच्या मुखपत्रात मतपेटीतील कथित चोरीबद्दल केलेल्या आरोपांवर बोलताना सामंत यांनी टीका केली. “लोकसभा निवडणुकीत निवडून आले, तेव्हा त्यांनी ईव्हीएमवर टीका केली नाही, पण विधानसभेला टीका केली. बिहारमध्ये ६५ लाख मतं बाजूला केल्यानंतरही जनतेने पंतप्रधान नरेंद्र मोदींना स्वीकारले आहे. त्यामुळे तो (व्होट चोरीचा) विषयही बाजूला पडला आहे. आता त्यांनी ही नवीन टूम (नवीन गोष्ट) काढली आहे,” असे ते म्हणाले.​

भाजप आमदार जयकुमार गोरे यांनी शिवसेना (उबाठा) गटाबाबत केलेल्या वक्तव्यावर मुख्यमंत्री एकनाथ शिंदे यांनी खुलासा केला असला तरी, सामंत यांनी गोरे यांना सबुरीचा सल्ला दिला.

​सामंत म्हणाले, “मुख्यमंत्री एकनाथ शिंदे साहेबांनी याचा खुलासा केलेला आहे की त्यांनी हे उद्गार उबाठा बाबत केलेले आहेत. जर ते तसं बोलले असतील तर ते चुकीचं आहे. एवढ्या मोठ्या नेतृत्वावर बोलण्यासाठी ते पात्र आहेत का, याचा विचार केला पाहिजे. आमच्या नेत्यांवरील टीका सहन केली जाणार नाही.” गोरे यांची ही पहिली टर्म असल्याने त्यांनी आपल्या वक्तव्यांमुळे वाद होणार नाही याची दक्षता घेतली पाहिजे, असेही त्यांनी सुचवले.

​मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांच्यातील कथित मतभेदांबद्दल झालेल्या चर्चांना सामंत यांनी पूर्णविराम दिला. “काल १५ मिनिटं देवेंद्रजी आणि शिंदे साहेबांनी दिलखुलास गप्पा मारल्या, त्यामुळे पहिली बातमी बाजूला झालेली आहे,” असे त्यांनी स्पष्ट केले.

​चिपळूण विधानसभा पोटनिवडणुकीत महायुतीचे उमेदवार उमेश सकपाळ यांचा विजय नक्की आहे, असा विश्वासही त्यांनी यावेळी व्यक्त केला. तसेच, राज्यात राजकीय समीकरणे बदलत असताना, भास्कर जाधव आणि रमेश कदम यांच्या संभाव्य एकत्र येण्यावर त्यांनी मार्मिक टिप्पणी केली.