इको कार- दुचाकी अपघातात तरुणाचा दुर्दैवी मृत्यू

रत्नागिरी: – रत्नागिरी तालुक्यातील नाखरे गावात बुधवारी दुपारी अडीच वाजण्याच्या सुमारास झालेल्या भीषण रस्ते अपघातात एका २९ वर्षीय तरुणाचा दुर्दैवी मृत्यू झाला. या अपघाताने संपूर्ण परिसरात हळहळ व्यक्त केली जात असून, शोककळा पसरली आहे. मयत तरुणाचे नाव चंद्रवदन शैलेंद्र शिंदे दसुरकर असे असून, तो नाखरे येथील रहिवासी होता.

मिळालेल्या माहितीनुसार, चंद्रवदन हा पावस येथून आपल्या नाखरे येथील घरी दुचाकीवरून परतत असताना हा अपघात घडला. पावस ते नाखरे या रस्त्यावरील खांबडवाडी परिसरात त्याच्या दुचाकीची एका चारचाकी इको गाडीशी जोरदार टक्कर झाली. या टक्कर इतकी भीषण होती की, चंद्रवदनचा जागीच मृत्यू झाला. विशेष म्हणजे, हा अपघात त्याच्या घरापासून अवघ्या एक किलोमीटर अंतरावर घडला, ज्यामुळे या घटनेची तीव्रता अधिकच वाढली.

चंद्रवदन हा एक बहुआयामी व्यक्तिमत्त्वाचा तरुण होता. त्याला ट्रेकिंगची प्रचंड आवड होती आणि तो एक यशस्वी आंबा व्यवसायिक म्हणूनही ओळखला जात होता. त्याने वकिलीचे शिक्षण पूर्ण केले होते आणि नुकतेच एक महिन्यापूर्वी त्याचे लग्न झाले होते. नवविवाहित असलेल्या चंद्रवदनच्या अकाली निधनाने त्याच्या कुटुंबावर आणि मित्रपरिवारावर दुःखाचा डोंगर कोसळला आहे.