आम्ही संघटना सांभाळण्यास खंबीर; ठाकरेंच्या सैनिकांचा ‘निरोप’
चिपळूण: हिंदूहृदयसम्राट स्व. बाळासाहेब ठाकरे यांनी उभी केलेली शिवसेना संघटना सोडून ज्यांना जायचे आहे त्यांनी वाट न बघता सोडून जावे.आम्ही संघटना सांभाळण्यास खंबीर आहोत. संघटना ठेकेदारीवर चालवायची नाही, असा सूर चिपळूण येथे झालेल्या उद्धव बाळासाहेब ठाकरे शिवसेना संघटनेच्या चिपळूण कार्यकर्ते, पदाधिकारी यांच्या बैठकीत उमटला. अनेक पदाधिकाऱ्यांना शिवसैनिकांच्या आक्रमक भूमिकेचा धक्का बसला आहे.
चिपळूण शहरातील एका हॉटेलच्या सभागृहात चिपळूण शहर परिसरातील ठाकरे शिवसेनेच्या कार्यकर्त्यांसह प्रमुख पदाधिकाऱ्यांची बैठक पार पडली. काही दिवसांपूर्वी शहरप्रमुख शशिकांत मोदी यांनी भाजपमध्ये प्रवेश केला. त्यापूर्वी सहसंपर्कप्रमुख सचिन कदम यांनीदेखील राजीनामा दिला. या पार्श्वभूमीवर ठाकरे सेनेची पडझड रोखण्यासाठी चिपळुणात खास बैठक आयोजित करण्यात आली.
बैठकीला विधानसभा क्षेत्रप्रमुख बाळा कदम, तालुकाप्रमुख विनोद झगडे यांसह काही प्रमुख पदाधिकाऱ्‍यांनी मार्गदर्शन केले. ही बैठक अत्यंत गोपनीय व खास निरोप देऊन बोलावण्यात आली होती; मात्र, बैठकीतील शिवसैनिकांचा आक्रमक सूर चर्चेच्या माध्यमातून शहरात उघड झाला. सुमारे अडीचशेहून अधिक कार्यकर्ते व पदाधिकारी या बैठकीला उपस्थित होते. प्रामुख्याने या बैठकीत शहरप्रमुखपदी नियुक्ती या विषयावर चर्चा होईल, अशी अपेक्षा होती; मात्र, बैठक सुरू झाल्यानंतर अनेक पदाधिकारी व कार्यकर्ते आक्रमक झाले.
संघटनेने गेल्या अनेक वर्षात ज्यांना भरभरून दिले असेच आता पडत्या काळात संघटना सोडून जात आहेत; मात्र, कोणत्याही परिस्थितीत आम्ही संघटना सोडणार नाही. कितीही संकटे आली तरी तेवढ्याच ताकदीने सामोरे जाऊ. संघटना अधिक जोमाने वाढवून भविष्यात एकहाती सत्ता मिळवू. ज्या कोणाला संघटना सोडून जायची आहे त्या नेते, पदाधिकाऱ्‍यांनी संघटना सोडून जावे, असा इशारा देण्यात आला. यामुळे आयोजकदेखील काही काळ नि:शब्द झाले.
हिंदूहृदयसम्राट बाळासाहेब ठाकरे यांनी उभी केलेली शिवसेना संघटना सोडून ज्यांना जायचे आहे त्यांनी वाट न बघता सोडून जावे. आम्ही संघटना सांभाळण्यास खंबीर आहोत. कोकणात शिवसेना आणि शिवसेनेचे कार्यकर्ते उद्धव बाळासाहेब ठाकरे यांच्या पाठीमागे खंबीरपणे उभे आहेत. – बाळा कदम, विधानसभा क्षेत्रप्रमुख शिवसेना चिपळूण