रत्नागिरीत आज “बेटी बचाओ, बेटी पढ़ाओ दशपूर्ती सोहळा रॅली”

जिल्हा पोलीस दल आणि जिल्हा महिला व बाल विकास कार्यालयाच्या वतीने आयोजन

रत्नागिरी : “बेटी बचाओ, बेटी पढ़ाओ” या भारत सरकारच्या उपक्रमाला २२ जानेवारी २०२५ रोजी दहा वर्षे पूर्ण झाली असल्याने रत्नागिरी जिल्हा पोलीस दल व जिल्हा महिला व बाल विकास कार्यालय यांच्या संयुक्त विद्यमाने आज (६ मार्च) सायंकाळी ४.३० ते ६ या वेळेत पोलीस कवायत मैदान, पोलीस मुख्यालय, रत्नागिरी येथे रत्नागिरी जिल्ह्यातील सर्व महिला व मुलींसाठी “बेटी बचाओ, बेटी पढ़ाओ दशपूर्ती सोहळा व दुचाकी रॅली” चे आयोजन करण्यात आले आहे.*

कोंकण परिक्षेत्राचे विशेष पोलीस महानिरीक्षक संजय दराडे (भा.पो.से.) यांच्या हस्ते या दशपूर्ती रॅलीला हिरवा झेंडा दाखवून शुभारंभ केला जाणार आहे. या प्रसंगी जिल्हा पोलीस अधीक्षक धनंजय कुलकर्णी, अपर पोलीस अधीक्षक जयश्री गायकवाड, पोलीस अधिकारी व अंमलदार, जिल्हा महिला व बाल विकास कार्यालय रत्नागिरी येथील अधिकारी व कर्मचारी उपस्थित असणार आहेत.

या दुचाकी रॅलीची सुरुवात पोलीस मुख्यालय कवायत मैदान येथूनहोईल. त्यानंतर ही रॅली जेल नाका, माळ नाका येथून परत जेल नाका, भाट्ये बीच, जयस्तंभ, रहाट घर, नाईक फॅक्टरी, पेठ किल्ला आणि तिथून परत पोलीस कवायत मैदान अशी मार्गक्रमणा करेल.

रत्नागिरी जिल्ह्यातील जास्तीत जास्त महिलांनी व मुलींनी या दशपूर्ती रॅलीमध्ये सहभाग घ्यावा, असे आवाहन रत्नागिरी जिल्हा पोलीस दलाच्या वतीने जिल्हा पोलीस अधीक्षक धनंजय कुलकर्णी यांनी केले आहे.