कुंभार्ली घाटात झालेल्या अपघातातील आईसह मुलाचा मृतदेह नातेवाइकांच्या ताब्यात

चिपळूण:- कराड-चिपळूण मार्गावरील कुंभार्ली घाटात रविवारी (दि. २३ फेब्रुवारी) रात्री झालेल्या अपघातातील आई आणि मुलाचे मृतदेह बुधवारी त्यांच्या नातेवाइकांच्या ताब्यात देण्यात आले.

रविवारी रात्री सुमारे २०० फूट खोल दरीत कार कोसळून भीषण अपघात झाला होता. शोध मोहिमेनंतर मंगळवारी सायंकाळी ही घटना उघडकीस आली. या अपघातात आई व मुलाचा जागीच मृत्यू झाला. विश्वजित जगदीश खेडेकर (४२), सुरेखा जगदीश खेडेकर (६५, दोघेही रा. कुंभार्ली) अशी मृतांची नावे आहेत.

विश्वजित व सुरेखा जगदीश खेडेकर हे दोघे यात्रेसाठी कारने पुणे येथून गावी कुंभार्लीकडे येत होते. पाटण येथे रविवारी रात्री ८.३० वाजता जेवण आटोपून ते पुढील प्रवासाला निघाले. रात्री १० च्या सुमारास कुंभार्ली घाटातील पोलीस चौकीपासून कार पुढे निघून गेली; मात्र चौकीपासून तिसऱ्या अवघड वळणावर सुमारे दोनशे फूट खोल दरीत कार कोसळली. यावेळी आजूबाजूला कोणीही नव्हते. त्यामुळे ही घटना कोणाच्याही लक्षात आली नाही; मात्र रविवारी उशिरापर्यंत ते दोघेही घरी पोहोचले नाही. पती जगदीश खेडेकर तेव्हापासून सलग दोन दिवस पत्नीच्या व मुलाच्या मोबाइलवर संपर्क साधत होते. दोघांच्याही मोबाइलची रिंग वाजत होती. परंतु संपर्क झाला नाही. अखेर मंगळवारी पती जगदीश खेडेकर यांनी पत्नी व मुलगा बेपत्ता असल्याची पोलिसांत खबर दिली. त्याप्रमाणे पोलिसांनी तात्काळ शोध मोहीम सुरू केली.

पोलिसांनी ड्रोनच्या साह्याने कुंभार्ली घाटातील दरीत शोध घेतला असता काळ्या रंगाची सफारी गाडी दिसून आली. त्याठिकाणी ग्रामस्थांच्या मदतीने पोहोचून पाहिले असता दोघेही मृतावस्थेत आढळून आले. काँग्रेसचे माजी तालुकाध्यक्ष भरत लब्ध्ये यांचे खेडेकर हे नातेवाईक आहेत. त्यांनी ग्रामस्थांसह तत्काळ घटनास्थळी पोहोचून रात्री उशिरा मृतदेह बाहेर काढले. उत्तरीय तपासणीनंतर आज मृतदेह नातेवाइकांच्या ताब्यात देण्यात आले.

या घटनेमुळे खेडेकर कुटुंबीयांवरती मोठा आघात झाला आहे. जगदीश खेडेकर यांच्या वडिलांचे सहा महिन्यांपूर्वीच निधन झाले. त्यानंतर खेडेकर यांना पत्नी व मुलाच्या मृत्यूमुळे हा दुसरा मोठा धक्का बसला आहे. या अपघाताची नोंद अलोरे शिरगाव पोलीस ठाण्यात करण्यात आली आहे. विश्वजित खेडेकर पुणे येथे एका नामवंत कंपनीत नोकरीला होते. त्यांची पत्नी डॉक्टर असून ते पुणे येथेच वास्तव्यास होते. त्यांच्या पश्चात, पत्नी, दीड वर्षाची मुलगी असा परिवार आहे.