आंजर्लेतील तरुणामुळे कर्नाटकातील बाळाला जीवदान
दापोली:- संपूर्ण जगात अतिदुर्मिळ ओएचएच अर्थात् बॉम्बे ब्लड ग्रुपच्या मराठी तरुणांच्या मदतीने कर्नाटकातील बाळाला जीवदान मिळाले आहे. यामध्ये कोकणातील दापोली तालुक्यातील आंजर्ले गावातील ओंकार धनावडे याच्या रक्तदानामुळे विजापूर या ठिकाणी एक वर्षाच्या बाळावर यशस्वीरित्या शस्त्रक्रिया झाली.
सांगली व कोकण येथील दोन दात्यांनी २०० किमी अंतर प्रवास करून स्वेच्छेने रक्तदान केले. त्यासाठी बॉम्बे ब्लड डोनर ग्रुपने पुढाकार घेतला होता. या बाळाच्या रूपाने कर्नाटकात या दुर्मिळ रक्तगटाची पहिली व्यक्ती समोर आली आहे. कर्नाटक-विजापूरच्या बबलेश्वर येथील अवघ्या एक वर्षाच्या सिद्धांत प्रभुणे या चिमुकल्याची तातडीने शस्त्रक्रिया करण्याचा सल्ला डॉक्टरांनी दिला होता. या मुलाची जीभ टाळ्याला चिकटलेली होती. त्याची शस्त्रक्रिया करण्यासाठी रक्ताची गरज होती; मात्र, त्यासाठी सिद्धांतचा ओएचएच (OHH) म्हणजेच बॉम्बे ब्लड ग्रुप असल्याचे निष्पन्न झाले. तो रक्तगट जगात दुर्मिळ आहे. त्यामुळे या रक्तगटाचा एकही दाता कर्नाटक राज्यात नाही.
सिद्धांतच्या पालकांनी महाराष्ट्रातील बॉम्बे ब्लड डोनर ग्रुपची माहिती मिळाली. संपर्क साधून ते सांगलीला आले. तोपर्यंत या डोनर ग्रुपचे अध्यक्ष विक्रम यादव यांनी तयारी केली होती. कोकणातील दापोली येथील ओंकार धनावडे हे सुमारे ३०० किमी तर कोची येथील हनुमंत भोसले सांगलीत आले. सिद्धांतचे पालक व मदतीसाठी इच्छुक तरुणांमध्ये भाषेचा अडसर निर्माण झाला. त्यांना मराठी कळत नव्हते तर यादव व इतरांना कानडी भाषा येत नव्हती. अशावेळी सांगलीत राहणाऱ्या सिकंदर जमादार यांची मदत घेण्यात आली. कर्नाटक सीमेवरील मूळ रहिवाशी जमादार यांना मराठी-कन्नड येत असल्यामुळे त्यांच्या मदतीने संवाद झाला.
यानंतर तज्ज्ञ डॉक्टरांच्या समोर रक्तदान प्रक्रिया व आईसबॉक्समध्ये भोसले व धनावडे या रक्तदात्यांनी दिलेल्या रक्ताची बॅग घेऊन नातलग रवाना झाले. विक्रम यादव व मित्रमंडळी यानंतरही त्यांच्या संपर्कात होते. वेळेवर अतिदुर्मिळ रक्त मिळाल्यामुळे इकडे विजापूरला मध्यरात्री यशस्वी शस्त्रक्रिया पूर्ण झाली. या रक्तगटाचा एकही व्यक्ती कर्नाटकात नसल्यामुळे सिद्धांतच्या पालकांनी महाराष्ट्राची मदत घेतली, अशी माहिती विक्रम यादव यांनी दिली आहे.
संपूर्ण जगात बॉम्बे बल्ड ग्रुप अत्यंत दुर्मिळ आहे. सुमारे एक लाखांमागे अवघ्या १० जणांमध्ये हा रक्तगट आढळून येतो. यादव यांच्या ग्रुपच्या माध्यमातून महाराष्ट्रासह देशात सुमारे ७५० रुग्णांना तर पाकिस्तान, नेपाळ, श्रीलंका, बांग्लादेश, बेल्जियम, मलेशिया, इंग्लंड, थायलंड, सिंगापूर, दुबईतील रुग्णांना आजवर या देशांमध्येही मदत केली आहे; मात्र सद्यःस्थितीत या रक्ताचे जगभरात केवळ ५४० व्यक्ती आहेत. त्यापैकी भारतात १८० जण आहेत. विक्रम यादव व त्यांचा ग्रुप अशा रुग्णांना वेळेवर रक्त उपलब्ध करून देण्यासाठी मदत करत आहेत.
*ओंकारने आठवेळा केले आहे रक्तदान*
ओंकार याने एकूण आठवेळा रक्तदान केले आहे. ओंकार बॉम्बे ब्लड डोनर ग्रुपचा सदस्य आहे. महाड, पुणे आदी ठिकाणी स्वखर्चाने त्याने प्रवास करून रक्तदान केले आहे. ओंकार व्यवसायाने बांधकाम व्यावसायिक म्हणून काम करत आहेत.