‘सरस’मध्ये 54 लाख 57 हजार रुपयांची उलाढाल
रत्नागिरी: महाराष्ट्र राज्य ग्रामीण जीवनोन्नती अभियान व जिल्हा ग्रामीण विकास यंत्रणा यांच्या संयुक्त विद्यमाने श्री क्षेत्र गणपतीपुळे येथे आयोजित करण्यात आलेल्या मिनी सरस व विक्री प्रदर्शनामध्ये अवघ्या पाच दिवसात 54 लाख 57 हजार रुपयांची विक्री झाली आहे.
हे जिल्हास्तरीय विक्री व प्रदर्शन हे ग्रामीण भागातील दारिद्रय रेषेखालील स्वरोजगारींनी, महिला बचत गटांनी उत्पादित केलेल्या विविध उत्पादित मालाच्या विक्रीसाठी हक्काचे व्यासपीठ मानले जाते. यामध्ये बचतगटांनी उत्पादित केलेल्या विविध प्रकारच्या कलात्मक वस्तू (बुरुड काम, गोधडी, लोकरीच्या विणकाम केलेल्या वस्तू, क्रेयॉनच्या वस्तू, इमिटेशन ज्वेलरी इत्यादी) विविध प्रकारचे घरगुती मसाले (मच्छी मसाले, मटण मसाले) पिठ, पापड (नाचणी, उडीद, लसुण, सोयाबीन, पालक, बीट, टोमॅटो, पोहयाचे, ओव्याचे इत्यादी) लोणची (आंबा, लिंबू, मिरची, आवळा, करवंद इत्यादी) कोकम, आगळ इत्यादी., कोकणी मेवा (काजूगर, काजू मोदक, आंबावडी, आमरस, आंबापोळी आवळा मावा, फणसपोळी, करवंद चडी, तळलेले गरे इत्यादी) विविध फळांची सरबते (जांभूळ सिरप, आंबा सिरप, काजू सिरप, आवळा सिरप इत्यादी) रस, कोकणी खाद्यपदार्थ (मोदक, आंबोळी, थालीपीठ, पुरणपोळी, घावणे, नारळवडी, जेवण, नर्सरी (आंबा कलमे, काजू कलमे, नारळ कलमे, चिकू कलमे, कोकम कलमे, विविध प्रकारची शोभिवंत फुलझाडे. बोन्साय इत्यादी) मध माफक दरात ग्राहकांना उपलब्ध करण्यात आली.
28 डिसेंबर रोजी सुरु झालेले प्रदर्शन 1 जानेवारीला संपले. या पाच दिवसात पर्यटकांनी तसेच ग्राहकांनी मोठ्या संख्येने भेट दिली आहे. 54 लाख 57 हजार 942 रुपयांची विक्री झाली आहे. जि.प.चे मुख्य कार्यकारी अधिकारी किर्तीकिरण पुजार, प्रकल्प संचालक विजयसिंह जाधव, माध्यमिक जिल्हा अभियान व्यवस्थापक अय्याज पिरजादे, जिल्हा विपणन व्यवस्थापक अमोल काटकर, जिल्हा व्यवस्थापक माहिती संकलन नयना बोरकर आदींनी भेट देऊन मार्गदर्शन केले.
या प्रदर्शनात कोकण साद महिला शेतकरी उत्पादक गटाने प्रथम क्रमांकाची उलाढाल केली. तर भक्ती स्वयंसहाय्यता समूह दापोली यांनी द्वितीय तर आदर्श स्वयंसहाय्यता समूह राजापूर यांनी तृतीय क्रमांकाची उलाढाल केली. उत्कृष्ट स्टॉल्स सजावटचा मान वनामृत मध उत्पादक गट संगमेश्वर, स्वामी स्वयंसहाय्यता समूह चिपळूण यांना मिळाला.