मुंबई-गोवा महामार्ग प्राधान्याने पुर्ण करणार

सार्वजनिक बांधकाम मंत्री भोसले यांनी दिली ग्वाही

मुंबई: मुंबई-गोवा राष्ट्रीय महामार्ग पूर्ण होणे राज्याच्या आणि जनतेच्या दृष्टीने महत्वाचे असल्याने या महामार्गाच्या कामास प्राधान्य देणार असल्याचे सार्वजनिक बांधकाम मंत्री शिवेंद्रसिंहराजे भोसले (सार्वजनिक उपक्रम वगळून) यांनी सांगितले. सार्वजनिक बांधकाम मंत्री भोसले यांनी मंगळवारी, ३१ डिसेंबर रोजी सार्वजनिक बांधकाम (सार्वजनिक उपक्रम वगळून) विभागाचा पदभार स्वीकारला.

यावेळी त्यांनी माध्यमांशी संवाद साधला. राज्याची सर्वांगीण प्रगती ही पायाभूत सुविधांवर अवलंबून असते. त्यामुळे राज्यात दर्जेदार रस्त्यांचे जाळे विकसित करण्याचा शासनाचा मानस आहे. त्याद्वारे ग्रामीण भागांना शहरांशी जोडण्यात येणार असून, नागरिकांना विविध सोयी-सुविधा उपलब्ध करुन देण्यात येणार आहेत.

कोकणसह राज्याच्या दृष्टीने महत्वाच्या मुंबई-गोवा राष्ट्रीय महामार्गाच्या कामाचा आढावा घेण्यात येणार असून, चुकीच्या पद्धतीने काम होत असेल किंवा जमीन हस्तांतरणात अडचणी येत असतील तर त्या समस्यांचे निराकरण करण्यात येईल. मुंबई गोवा राष्ट्रीय महामार्ग पूर्ण होणे राज्याच्या आणि जनतेच्या दृष्टीने महत्वाचे असल्याने या महामार्गाच्या कामास प्राधान्य देणार असल्याचा पुनरुच्चार मंत्री भोसले यांनी केला.
मुख्यमंत्र्यांबरोबर चर्चा
पदभार स्वीकारल्यानंतर त्यांनी आपल्या दालनात विभागाच्या वरिष्ठ अधिकाऱ्यांची बैठक घेऊन सविस्तर आढावा घेतला. येत्या एक – दोन दिवसांत मुख्यमंत्री देवेंद्र फडणवीस यांच्याबरोबर विभागाच्या १०० दिवसांच्या उद्दिष्टांबाबतही बैठक होणार आहे.